ورشة البوليرو الرائع تعالو يا بنات ......

اهلا بكن معايا في ورشة البوليرو الرائع.

البوليرو انا عملته لسن 3 سنوات ولي عاوزة تعمل مقاس اكبر تزود بس في سلاسل البداية وفي عدد الانناسات.

الغرز الي حنستعمل في الورشة هي

غرزة العمود

غرزة السلسلة

غرزة العمود بلفتين
وغرزة البيكو.

ومعانا في الورشة

بسمة زهرة

ام العلوم

ام طارق

دكتورة المستقبل

واي واحدة عاوزة تنضم لينا اهلا بيها تنور الورشة وصاحبتها.

ده البوليرو

بسم الله نبتدي الشرح
انا سبق وقلت اني عملت مقاس تلات سنين ولي عاوزة تعمل مقاس اقل او اكبر تنقص او تزود بس في عدد السلاسل وفي عدد الانناسات.

اول شئ نعمل سلسلة بمقاس الرقبة انا عملت سلسلة عدد 100 وماكانت بنت اختي موجودة فقست على رقبتي ووعملتها زي ماكون حاطة ايدي على رقبة حد بخنقه هههههههههههه .
وبعد ماجات بنت اختي لقيت اني عملت العدد اكبر شوية يعني البوليرو طلع واسع عليها شوية بس مش مشكلة علشان الاطفال بيكبرو ماشاء الله عليهم.
اكمل وبلاش ثرثرة هههههه

السطر الاول

اول شئ نعد تلات سلاسل ونعمل عمود بلفة واحدة في الغرزة الرابعة ونعمل عمود وعمود وسلسلة وتلات اعمدة كل ده في نفس العين ونسمي دي مروحة. ونعمل بعد كده خمس سلاسل ونعد تلات سلاسل ونعمل غرزة حشو في الغرزة الرابعة ونعمل خمس سلاسل ونعد تلات غرز من السلسلة ونعمل غرزة حشو ونكمل بالشكل ده لاخر السلاسل الي عملناها ولما نوصل اخر عين نعمل عليها مروحة .
وده تطبيقي للسطر الاول





السطر التاني

نطلع باربع سلاسل ونروح وسط المروحة الاولى ونعمل مروحة يعني تلات اعمدة وسلسلة وتلات اعمدة ونعمل سلسلتين ونروح وسط السلاسل الخمسة ونعمل وسطهم 9 عواميد بلفتين وسلسلتين ونروح وسط السلاسل التانيين ونعمل وسطهم غرزة حشو وخمس سلاسل ونعمل غرزة حشو على وسط السلاسل الخمسة من السطر السابق (ودي حتكون تالت خمس سلاسل من السطر السابق )
ونعمل سلسلتين ونروح وسط السلاسل رقم اربعة ونعمل وسطهم تسع اعمدة بلفتين وسلسلتين وغرزة حشو ونعيد نفس التطبيق لاخر السطر ونعمل المروحة بتاعتنا الاخيرة وكده خلصنا السطر التاني
وده تطبيقي للسطر التاني




السطر التالت

نطلع باربع سلاسل ونروح وسط المروحة ونعمل المروحة بتاعتنا عادي ودي حتفضل معانا لاخر البوليرو.
ونعملسلسلتين وعمود بلفتين على اول عمود بلفتين من الانناسة الي عملناها في السطر التاني.وسلسلة وعمود بلفتين وسلسلة وعمود بلفتين لغاية اخر الاعمدة التسعة وسلسلتين ونعمل وسط الخمس سلاسل من السطر التاني نعمل مروحة يعني تلات اعمدة وسلسلة وتلات اعمدة وسلسلتين ونعمل الاعمدة التسعة زي اول الشرح ونكمل السطر ده للاخر ونعمل المروحة الاخيرة عادي وده تطبيقي للسطر ده








وده شكل البداية والنهاية بتكون ازاي كلها مراوح




السطر الرابع


نطلع باربع سلاسل ونعمل المروحة بتاعتنا ونعمل بعد كده سلسلتين ونعمل غرزة حشو على اول سلسلة بين العواميد الاول والتاني واربع سلاسل وغرزة حشو وسط السلسلة التانية واربع سلاسل وغرزة حشو وسط السلسلة التالتة ونكمل كده لغاية اخر سلسلة في الانناسة وحيكون عندنا سبع اهرامات ونكمل نعمل سلسلتني ونعمل المروحة وسلسلتين ونعمل نفس الشئ على الانناسة التانية ونكمل بنفس الطريقة للاخر ونعمل مروحتنا عادي وده تطبيقي للسطر ده





السطر الخامس

السطر ده حنغير في المروحة الاولى والاخيرة نعمل اربع سلاسل ونروح للمروحة ونعمل عليها تلات اعمدة وسلسلة وتلات اعمدة وسلسلة وتلات اعمدة .
ونعمل سلسلتين وغرزة حشو وسط الهرم الاول واربع سلاسل وغرزة حشو على الهرم التاني واربع سلاسل وغرزة حشو على الهرم الي بعد كده لاخر الاهرامات ونعمل سلسلتين ونعمل وسط المروحة تلات اعمدة وسلسلة وتلات اعمدة وسلسلة وتلات اعمدة ونعمل سلسلتين ونعمل نفس الشئ بالانناسة التانية ونكمل بنفس الطريقة لاخر السطر وده تطبيقي للسطر ده





السطر السادس

نطلع بتلات سلاسل ونعمل مروحة على اول سلسلة ونعمل تلات سلاسل ومروحة على تاني سلسلة ونعمل سلسلتين وغرزة حشو وسط الهرم الاول واربع سلاسل وغرزة حشو وسط الهرم التاني ونكمل كده لاخر الاهرامات وسلسلتين ونروح وسط المروحة الاولى ونعمل مروحة يعني نعمل تلات اعمدة وسلسلة وتلات اعمدة ونعمل بعد كده تلات سلاسل ونروح للسلسلة التانية ونعمل عليها نفس الشئ تلات اعمدة وسلسلة وتلات اعمدة ونعمل سلستين ونعمل الانناسة زي ماسبق وعملنا ونكمل بالطريقة دي لاخر السطر وده تطبيقي للسطر ده










ياله كملو الاسطر دي وبعد ماتخلصوها نزلو تطبيقاتكم علشان اكملكم الشرح الباقي وتخلصوه بسرعة .
ولو في اي استفسار انا موجودة وتحت امركم والبوليرو سهل كتير.
ياله بالتوفيق حبيباتي.










اهلا بكن معانا في الشرح ورشة بوليرو رائئئع

بسم الله نبتدي على بركة الله

السطر السابع

نبتدي باربع سلاسل ونروح للمروحة ونشتغلها عادي ونعمل سلسلتين(على فكرة في البوليرو عاملين اربع سلاسل بس انا خايفة البوليرو يوسع اكتر فعملت سلسلتين لو تحبو تعملو بدل2 اعملو 4 سلاسل)ونروح وسط السلاسل التلات من السطر السابق ونعمل وسطهم عمود وخمس سلاسل وعمود في نفس العين وبعد كده سلسلتين ونروح نعمل مروحتنا ونعمل سلسلتين ونعمل غرزة حشو على الهرم الاول واربع سلاسل وغرزة حشو على الهرم التاني ونكمل كده لاخر الاهرامات ونعمل سلسلتين والمروحة وسلسلتين ونعمل وسط السلاسل التلات عمود وخمس سلاسل وعمود ونكمل بالطريقة دي لاخر السطر وده تطبيقي للسطر ده






السطر التامن

نعمل اربع سلاسل والمروحة بتاعتنا ونعمل وسط السلاسل الخمسة من السطر السابق نعمل 9 عواميد بلفتين لبداية الانناسة ونعمل سلسلتين والمروحة التانية ونعمل سلسلتين وغرزة حشو في اول هرم واربع سلاسل وغرزة حشو ونكمل كده لاخر الاهرامات ونعمل سلسلتين ونعيد نفس الشئ على الانناسة التانية ونكمل كده لاخر السطر وده تطبيقي للسطر ده
انا صورت البداية علشان توضحلكم ازاي بتكبر بسبب الزيادة الي عملناها








السطر التاسع

نبتدي باربع سلاسل ونعمل مروحتنا ونعمل سلسلتين ونروح على اول عمود بلفتين ونعمل عليه عمود بلفتين وسلسلة ونعمل عمود على العمود التاني وسلسلة لغاية اخر التسع عواميد وسلسلتين ونروح نعمل غرزة حشو على الهرم الاول واربع سلاسل وغرزة حشو على الهرم التاني وكده فضل عندنا بس هرمين ونكمل كده لاخر السطر وده التطبيق بتاعي












كفاية اليوم التلات اسطر دول وبكرة اكملك ان شاء الله








بسم الله نبتدي الشرح الباقي الي نسبق ونزلت شرحه للاخت العزيزة دكتورة المستقبل وكان من غير صور

السطرالعاشر

نعمل اربع سلاسل ونعمل المروحة بتاعتنا ونعمل بعدها سلسلتين ونعمل غرزة حشو على اول سلسلة الي بين اول عمود وتاني عمود ونعمل اربع سلاسل وغرزة حشو على تاني سلسلة ونكمل كده لاخر العواميد زنعمل سلسلتين وونعمل بعدها مروحتنا وسلسلتين وغرزة حشو على الهرم الاول واربع سلاسل وغرزة حشو على الهرم التاني حيكون عندنا هرم واحد بس ونعمل سلسلتين وغرزة حشو على اول سلسلة ونكمل كده لاخر السطر وده تطبيقي للسطر ده




السطر الحادي عشر

نطلع باربع سلاسل ونعمل المروحة ونعمل سلسلتين وغرزة حشو على اول هرم واربع سلاسل وغرزة حشو على تاني هرم ونكمل كده لاخر الاهرامات ونعمل سلسلتين والمروحة وسلسلتين وغرزة حشو وسط الهرم الوحيد الي فضل وسلسلتين والمروحة وسلسلتين وغرزة حشو ونكمل كده لاخر السطر ودي صورة للسطر ده




السطر التاني عشر

نطلع بتلات سلاسل ونعمل المروحة بتاعتنا عادي ونعمل سلسلتين ونعمل غرزة حشو على اول هرم واربع سلاسل وغرزة حشو على تاني هرم ونكمل كده لاخر الاهرامات ونعمل سلسلتين ونعمل المروحة ونعمل المروحة الي بعدها من غير اي سلسلة بينهم ونعمل سلسلتين وغرزة حشو ووو ونكمل كده لاخر السطر وده تطبييقي للسطر ده




وكده خلصنا اول انناسة نتقابل مع باقي الشرح بادن الله.





اهلا بكن يا حلوات
اسفة لان الصور راحت ومركز التحميل الي كنت بحمل منه الصور اتقفل وسابني في الحوسة دي
بس حملتهم من موقع جديد وحنزلهم هنا كل سطر بالرقم بتاعه يعني صورة للسطر الاول وصورة للسطر التاني وكده لغاية ماارجع كل الصور

نبتدي على بركة الله
السطر الاول


السطر التاني



السطر التالت







السطر الرابع



السطر الخامس



السطر السادس




السطر السابع




السطر التامن



السطر التاسع





السطر العاشر



السطر الحادي عشر



السطر التاني عشر

اهلا بكن معانا في شرح الجزء التاني من ورشة بوليرو رائئئع
بسم الله نكمل الشرح

السطرالتالت عشر

نطلع باربع سلاسل ونعمل مروحتنا عادي ونعمل سلسلتين وغرزة حشو وسط الهرم الاول واربع سلاسل وغرزة حشو على الهرم التاني ونكمل كده لاخر الاهرامات وسلسلتين والمروحة وتلات سلاسل والمروحة التانية وسلستين وغرزة حشو ونكمل كده لاخر السطر وده شكل السطر ده



السطر الرابع عشر

نطلع باربع سلاسل ونعمل المروحة بتاعتنا ونعمل سلسلتين وغرزة حشو وسط الهرم الاول واربع سلاسل وغرزة حشو على الهرم التاني ونكمل كده لاخر الاهرامات ونعمل سلسلتين والمروحة ونعمل عمود وسط السلاسل التلات بتوع السطر السابق ونعمل خمس سلاسل وعمود في نفس العين الي عملنا فيها العمود وسلسلتين والمروحة وسلسلتين وغرزة حشو على اول هرم ونكمل كده لاخر السطر وده تطبيقي للسطر ده


السطر الخامس عشر

نطلع باربع سلاسل ونعمل مروحتنا ونعمل سلسلتين وغرزة حشو على اول هرم واربع سلاسل وغرزة حشو على الهرم التاني ونكمل كده لاخر الاهرامات ونعمل سلسلتين والمروحة وسلسلتين ونعمل وسط السلاسل الخمسة من السطر السابق نعمل تسع 9 عواميد بلفتين ونكمل نعمل سلسلتين والمروحة وسلسلتين وغرزة حشو على اول هرم ونكمل كده وده تطبيقي للسطر ده



السطر السادس عشر

نطلع باربع سلاسل ونعمل مروحتنا ونعمل سلسلتين وغرزة حشو وسط الهرم واربع سلاسل وغرزة حشو وسط الهرم التاني ونعمل سلسلتين ونروح نعمل مروحة وبعد كده نعمل عمود بلفةتين على اول عمود بلفتين من السطر السابق ونعمل سلسلة ونعمل عمود بلفتين على تاني عمود وسلسلة لاخر الاعمدة التسعة ونعمل سلسلتين والمروحة وسلسلتين وغرزة خشو ونكمل كده لاخر السطر

السطر السابع عشر

نطلع باربع سلاسل ونعمل مروحتنا ونعمل سلسلتين وغرزة حشو وسط الهرم ونعمل سلسلتين والمروحة ونعمل بعد كده سلسلتين ونعمل غرزة حشو وسط اول سلسلة واربع سلاسل وغرزة حشو على تاني سلسلة ونكمل كده ودي صورة بتوضح السطر السابق والسطر ده



السطر التامن عشر

نطلع باربع سلاسل ونعمل مروحتنا عادي ونعمل المروحة التانية وسلسلتين ونعمل غرزة حشو على اول هرم واربع سلاسل وغرزة حشو على تاني هرم ونكمل كده لاخر السطر وده تطبيقي للسطر ده




السطر التاسع عشر

هنا حنغير في المروحة لاننا مش حنزود فيها بل حننقص
حنعمل اربع سلاسل ونعمل تلات اعمدة وسلسلة ونروح للمروحة التانية ونعمل تلات اعمدة وبس ونعمل بعد كده سلسلتين وغرزة حشو وسط اول هرم واربع سلاسل وغرزة حشو على تاني هرم ونكمل كده لاخر الاهرامات ونعمل سلسلتين ونعمل المروحة عادي ونعمل تلات سلاسل والمروحة التانية ونكمل السطر للاخر وده تطبيقي للسطر ده


السطر العشرون

نطلع باربع سلاسل ونعمل المروحة وسط السلسلة الي بين التلات اعمدة يعني عندنا تلات اعمدة وسلسلة وتلات اعمدة نعمل المروحة وسط السلسةلة الي بينهم ونكمل سلسلتين وغرزة حشو وسط اول هرم واربع سلاسل وغرزة حشو وسط الهرم التاني ونكمل لاخر الاهرامات وبعد كده سلسلتين ونعمل المروحة ونعمل عمود وسط السلاسل التلات من السطر السابق ونعمل خمس سلاسل وعمود في نفس العين وسلسلتين والمروحة ونكمل كده لاخر السطر وده تطبيقي للسطر ده



السطر الواحد والعشرون

نطلع باربع سلاسل ونعمل مروحتنا عادي ونروح نعمل سلسلتين وغرزة حشو على اول هرم واربع سلاسل على تاني هرم ونكمل لاخر الاهرامات ونعمل سلسلتين والمروحة وسلسلتين وتسع اعمدة بلفتين على السلاسل الخمسة من السطر السابق ونكمل كده لاخر السطر وده تطبيقي للسطر ده


ياله كفاية كده تعبت من تحميل الصور هههههههه ياله طبقو الشرح ده وبعد مااشوف تطبيقاتكم انزلكم باقي الشرح ياله بالتوفيق حبيباتي .






السطر التالت عشر





السطر الرابع عشر



السطر الخامس عشر



السطر السادس عشر والسابع عشر





السطر التامن عشر



السطر التاسع عشر




السطر العشرون



السطر الواحد والعشرون

بسم الله نبتدي الجزء الاخير من ورشة بوليرو رائئع

السطر التاني والعشرون

نطلع باربع سلاسل ونعمل المروحة وسلسلتين وغرزة حشو وسط اول هرم واربع سلاسل وغرزة حشو على تاني هرم واربع سلاسل وغرزة حشو ونعمل سلسلتين ونعمل المروحة وبعد كده نعمل على كل عمود بلفتين عمود بلفة وسلسلة ونكمل كده لاخر السطر وده تطبيقي للسطر ده

السطر التالت والعشرون

نطلع باربع سلاسل ونعمل مروحتنا ونعمل سلسلتين وغرزة حشو وسط الهرم الاول واربع سلاسل وغرزة حشو على تاني هرم وسلسلتين ونروح للاعمدة ونعمل غرزة حشو على اول سلسلة واربع سلاسل وغرزة حشو على تاني سلسلة ونكمل كده لاخر السطر



السطر الرابع والعشرون

نطلع باربع سلاسل ونعمل المروحة ونعمل سلسلتين وغرزة حشو وسط الهرم الوحيد وسلستين والمروحة وسلسلتين وغرزة حشو على الهرم الاول واربع سلاسل وغرزة حشو على الهرم التاني ونكمل لاخر الاهرامات وسلسلتين والمروحة وهما حنعمل الكم الاول حنعمل بعد المروحة عشر 10 سلاسل ونروح للجهة المقابلة ونعمل على اول عمود من الانناسة التالتة نلزق الخيط على اول مروحة ونكمل التطبيق لغاية مانوصل للكم التاني ونعمل نفس الشئ 10 سلاسل والمروحة من الجهة الاممامية ونكمل للاخر وده تطبيقي للسطر ده


السطر الخامس والعشرون

نطلع باربع سلاسل ونعمل تلات اعمدة وسط المروحة الاولى وسلسلتين وتلات اعمدة من المروحة التانية وسلسلتين وغرزة حشو على اول هرم واربع سلاسل وغرزة حشو على تاني هرم ونكمل لاخر الاهرامات ونعمل سلسلتين والمروحة ونعمل سلسلتين ونلزقهم بغرزة حشو وسط السلاسل العشر الي عملناهم وسلسلتين والمروحة الي في الضهر ونكمل كده لاخر السطر ونعمل نفس الشئ على الجهة التانية

السطر السادس والعشرون

نطلع بارع سلاسل ونعمل المروحة وسط الاعمدة الي عملناهم ونعمل سلسلتين وغرزة حشو وسط اول هرم واربع سلاسل وغرزة حشو على تاني هرم ونكمل كده لاخر الاهرامات ونعمل سلسلتين والمروحة ونعمل تلات سلاسل ونعمل مروحة الضهر ونكمل كده لاخر السطر

السطر السابع والعشرون

نطلع باربع سلاسل ونعمل المروحة ونعمل سلسلتين وغرزة حشو على اول هرم واربع سلاسل وغرزة حشو على تاني هرم ونكمل لاخر الاهرامات وسلسلتين والمروحة ونعمل وسط السلاسل التلات من السطر السابق نعمل عمودين وسلسلتين ومروحة الضهر ونكمل كده ونعمل نفس الشئ على الباط التاني وده شرح بيوضح الاسطر الي سبق شرحها



السطر التامن والعشرون

مطلع باربع سلاسل ونعمل مروحتنا وسلستين وغرزة حشو على اول هرم واربع سلاسل وغرزة حشو على تاني هرم ونكمل كده وسلسلتين والمروحة ونعمل سلسلتين ونعمل سلستين وكمان تلات سلاسل ونشبكها باول التلات سلاسل ودي غرزة بيكو وسلسلتين وننعمل غرزة حشو على السلاسل الاتين من السطر السابق ونعمل سلسلتني ونفس الشئ سلسلتين والات سلاسل ونلزق اخر عين باول عين من السلاسل التلات وده بيوضحو الصورة دي ونكمل لاخر السطر



السطر التاسع والعشرون

نطلع باربع سلاسل ونعمل مروحتنا ونعمل سلسلتين وغرزة حشو على اول هرم ونكمل لاخر الاهرامات وسلسلتين المروحة ونعمل سلسلتين ونلزقهم بغرزة حشو على السلاسل الاتنين من السطر اليابق ونعمل بيكو بعد كده ونلزقها زي الصورة دي ونكمل لاخر السطر



السطر الثلاتون

نطلع باربع سلاسل ونعمل المروحة وسلسلتين وغرزة حشو على الهرم الي فاضل وسلسلتين والمروحة ونعمل نفس الشئ على الاهرامات التانية سلسلتين وغرزة حشو على اول سلاسل من السطر السابق ونعمل اربع سلاسل ونلزقهم بالسلاسل التانيين ونعمل بيكو ونمشي كده للاخر وده تطبيقي للسطر ده





السطر الواحد والتلاتون

نطلع باربع سلاسل ونعمل المروحة ونعمل ايضا المروحة الي بعد كده وسلسلتين ونعمل نفس الشئ لاخر السطر زي الصورة دي


ياله يا حلوات طبقو الشرح كله ومش فاضل غير سطرين او تلاتة حكملهم بكرة او بعده بادن الله .









:welcome1: :welcome1: :welcome1: :welcome1:

نكمل باقي السطر بادن الله
هي على فكرة خلصت لغاية ماشرحت يعني كان اخر سطر في البوليرو هو السطر الاخير من الشرح السابق بس انا قلت اطول سطرين كمان لو تحبي تعمليهم اوكي لو شايفة ان البوليرو تمام خلاص ماتعمليهم.
انا اعدت نفس السطر مرتين يعني اعدت السطر الواحد والتلاتون مرتين علشان ماينفعش ابتدي انناسة جديدة
وبعد ماخلصت الاسطر عملت اربع اسطر وطلعت للمروحة الي عندنا وعملت غرزة حشو على الاربع سلاسل الي عندنا والي كنا بنطلع بيهم
وسلسلتين وغرزة حشو على العمود الاول من الاعمدة التلاتة وسلسلتين وغرزة حشو على السلاسل الاربعة ونكمل كده دوران على كل البوليروولما نوصل للرقبة نعملها زي ماهي اربع سلاسل وغرزة حشو وسط السلاسل الاربعة الي عملناهم اول مرة او الخمسة وكملي لاخر الجهة وتعملي نفس الشئ على الجانب التاني وعلى تحت انا شرحتلك باللون الابيض حتعملي ايه تحت البوليرو وكمان الصورة موضحة السطرين الي اضفتهم



وبعد ماتعملي كل السطر ده يعني تدوري على البوليرو كله تلزقي اخر عين باول عين من السلاسل الي عملناها وتقفليها بمنزلقة
السطر الاخير
تطلعي بسلسلتين وكمان تلات سلاسل وبيكو وسط السلاسل التلات وسلسلتين وغرزة حشو وسط السلسلتين الي بعد كده من السطر السابق وتمشي كده لاخر السطر
ونعمل نفس الشئ على الاكمام نعمل الخيط تحت الباط وسط السالسل التلات ونعمل اربع سلاسل وغرزة حشو وسط وسط المروحة واربع سلاسل ونكمل كده لاخر السطر ونقفل بمنزلقة


:

وكده ككملت على بركة الله الشرح ونتقابل مع ورشة جديدة بادن الله.








السطر التاني والعشرون



السطر التالت والعشرون



انا هنا بعد ماصورت التطبيق رجعت وفكيت السطر بس سيبته علشان تشوفه ازاي الشكل




السطر الرابع والعشرون



السطر الخامس والعشرون والسادس والعشرون والسابع والعشرون
التلات اسطر متجمعين في الصورة دي



السطر التامن والعشرون



السطر التاسع والعشرون



السطر التلاتون



السطر الواحد والتلاتون





السطرين الي اضفتهم بعد كده وهما بس اعادة لنفس السطر الواحد والتلاتون



وبعد مانخلص الاسطر دي نكمل زي الخط الابيض نعمل اربع سلاسل وغرزة حشو او منزلقة طول البوليرو ونلزقه بغرزة منزلقة ونعمل السطر التاني بيكو زي ماانا موضحة في الصورة الي فوق.

ياله مع السلامة الورشة خلصت ونتقابل مع ورشة جديدة بادن الله.

يلا مجهزه الخيط جنبي ههههه

دكتورة المستقبل كتب:

يلا مجهزه الخيط جنبي ههههه

اهلا بيكي حبيبتي دعاء ياله الشرح نزل اشتغلي ولو نزلتي تطبيقك بكرة او بعده اكملك ان شاء الله الباقي .بالتوفيق حبيبتي.

نطلع باربع سلاسل ونروح وسط المروحة الاولى ونعمل مروحة يعني تلات اعمدة وسلسلة وتلات اعمدة



طيب سماره موش المفروض الاربع سلاسل تعتبر عمود ولا؟؟

دكتورة المستقبل كتب:

نطلع باربع سلاسل ونروح وسط المروحة الاولى ونعمل مروحة يعني تلات اعمدة وسلسلة وتلات اعمدة



طيب سماره موش المفروض الاربع سلاسل تعتبر عمود ولا؟؟

لا اختي السلاسل الاربعة مالهمش دعوة بالمروحة خالص لانهم بعد مانخلص عنعمل عليهم الغرز البيكو زي البوليرو شوفيه كويس.
اعملي الاربع سلاسل وروحي وسط المروحة واعملي تلات عواميد وسلسلة وتلات عواميد.بالتوفيق حبيبتي.

بسمة زهرة كتب:

ووعملتها زي ماكون حاطة ايدي على رقبة حد بخنقه هههههههههههه . يلا ايش بده يعمل فيك اكيد يموتك بس انا برضى ههههههههههههههههههههههههههههههههههههههههههههههههههههههههههه الان استفسار هل غرزة العمود بلفتين اي يكون اربع اعمدة السطر الاول اول شئ نعد تلات سلاسل ونعمل عمود بلفة واحدة في الغرزة الرابعة ونعمل عمود وعمود وسلسلة وتلات اعمدة كل ده في نفس العين ونسمي دي مروحة. هل افهم مروحة تتكون من 6 عمود

هههههههه ايوة اكيد بده يخنقك هههههههه
حبيبتي سلمى العمود بلفتين يعني بتلفي الخيط مرتين على الابرة وتشتغلي اول خيط وبعدين الخيط التاني يعني كل لفة خيط بتشتغليها لوحدها وبنسميه بلفتين لانك بتشتغلي اللفتين مش لفة واحدة وبيكون شكله اطول من عمود بلفة .
وتانيا مش ضروري تكون بعمود وسلسلة وعمود احنا بنقول مروحة علشان نسهل الشرح يعني بدل مااقول كل مرة تلات اعمدة وسلسلة وتلات اعمدة افضل اكتب مروحة وهي شكلها مروحة .
ياله حبيبتي بالتوفيق.

مشكورة سمورة ان شاء الله جاري تنفيذ بس لا تقطع كهرباء اكون خالصت هههههههههههههههههه

بسمة زهرة كتب:

مشكورة سمورة ان شاء الله جاري تنفيذ بس لا تقطع كهرباء اكون خالصت هههههههههههههههههه

ان شاء الله حبيبتي سلمى وانا منتضرة تطبيقك بالتوفيق

سموره حبيبتي اريد اشتغل معاكم ولكن الصور ماتظهر لي ومااعرف اشتغل بدون الصور شسوي اه اه اه

الحمد لله ظهرت الصور

طيب انا شوي واخلص وانزل التطبيق بعدين ان شاء الله



بس سؤال ليش في السطر السادس طلعنا ب3سلاسل مو اربع؟؟؟؟

[quote="دكتورة المستقبل"]طيب انا شوي واخلص وانزل التطبيق بعدين ان شاء الله



بس سؤال ليش في السطر السادس طلعنا ب3سلاسل مو اربع؟؟؟؟[/quote


هههههههه حبيبتي دعاء ده بس سهو مني علشان متعودة اكتب نطلع بتلات سلاسل كعمود اول هههههههه بس دي اربع سلاسل لو في اي رقم غلط عدلوه لوحديكم .
ياله مستنيي تطبيقك وتطبيق الاخوات العزيزات .

ام العلوم كتب:

الحمد لله ظهرت الصور

هي الصور بتاخد وقت علشان تفتح وبس انت انتضري لغاية ماتفتح الصفحة
ومستني تطبيقك .

سموره ايصير اشتغل بخيط رفيع جدا مثل خيط الورده الذهبي

ام العلوم كتب:

سموره ايصير اشتغل بخيط رفيع جدا مثل خيط الورده الذهبي

اكيد اختي انا كمان عملته بخيط رفيع وبشتغله بابرة راسها رفيع.

هذا تطبيقي^^

دكتورة المستقبل كتب:

هذا تطبيقي^^

تطبيقك حلو حبيبتي دعاء بس انا نسيت حاجة في السطر الخامس والسادس.
ورجعت وكتبت الشرح من تاني بس النت فصل وما كتبت اني غلطت في السطرين مع ان الصورة موضحة ان في زيادة في المراوح الاولى والاخيرة.
فكي السطر السادس والخامس واعملي الزيادة في اول المروحة علشان نبتدي انناسة جديدة.
واسفة كتير حبيبتي للغلطة دي .

ان شاء الله صح هالمره

دكتورة المستقبل كتب:

ان شاء الله صح هالمره

اسفة اني خليتك فكيتي حبيبتي السطرين بس اعمل ايه نسيت ههههههههه
تطبيقك رائع تسلم ايديكي.واللون حلو كتير حيطلع بوليرو رائع ملبوس الهنا لاختك الصغيرة.

اهم شي عجبك شغلي شكرا شكرا



وان شاء الله نخلصه قبل يوم الاربعاء الجاي لاني بسافر على خيررر

دكتورة المستقبل كتب:

اهم شي عجبك شغلي شكرا شكرا



وان شاء الله نخلصه قبل يوم الاربعاء الجاي لاني بسافر على خيررر

ايوة شغلك حلو كتير ماشاء الله عليكي وان شاء الله انزلك الشرح بكرة وكل ماتخلصيه نزلي تطبيقك وكده نكمل قبل يوم الاربعاء بادن الله.